දරුවා මුහුදට ගසාගෙන යද්දීත් ෆෝන් එක දිහා බලාගෙන හිටපු අම්මයි තාත්තයි! ලෝකයම කම්පා කළ ඛේදවාචකය…

වර්තමානයේ බොහෝ දෙනෙකු සමාජ මාධ්‍ය තුළ ජනප්‍රිය වීමට සහ ලයික්ස්, වීව්ස් ලබා ගැනීමට දරන උත්සාහය නිසා සැබෑ ජීවිතයේ වටිනාම දේවල් පවා අමතක කර දමන අවස්ථා අපට කොතෙකුත් අසන්නට ලැබෙනවා.

එලෙස ඩිජිටල් තිරය ඉදිරියේ මව්පිය සෙනෙහස සහ වගකීම පවා අමතක වී ගිය කම්පන සහගත පුවතක් පිළිබඳව මේ වන විට ලොව පුරා දැඩි කතාබහක් නිර්මාණය වී තිබෙනවා.

ඉන්දියාවේ ‘India Today’ පුවත් සේවය වාර්තා කරන පරිදි, මුහුදු වෙරළක සමාජ මාධ්‍ය වෙනුවෙන් වීඩියෝවක් පටිගත කරමින් සිටි මව්පිය යුවළකගේ නොසැලකිලිමත්කම නිසා ඔවුන්ගේ කුඩා දියණිය මුහුදු රළට හසුවන ආකාරය දැක්වෙන වීඩියෝවක් මේ වන විට ‘X’ ඇතුළු සමාජ මාධ්‍ය ජාලා ඔස්සේ වේගයෙන් සංසරණය වෙමින් පවතිනවා.

සිද්ධිය වන අවස්ථාවේදී මෙම යුවළ වෙරළට පැමිණෙන මුහුදු රළ ආසන්නයේ ගමන් කරමින් සමාජ මාධ්‍ය වීඩියෝවක් පටිගත කරමින් සිට ඇති අතර, මව සිය කුඩා දියණියගේ දෑත් අල්ලාගෙන සිට තිබෙනවා. නමුත් ඔවුන්ගේ සම්පූර්ණ අවධානය යොමුවී තිබී ඇත්තේ දරුවා වෙත නොව කැමරාව වෙතයි.

ගතවූයේ නිමේෂයකි. මවගේ අතේ එල්ලී සිටි පුංචි දියණිය එක්වරම ඇයගේ ග්‍රහණයෙන් මිදී වැලි මත ඇද වැටී තිබෙනවා. ඒ සමඟම පැමිණි මුහුදු රළ පහරට කුඩා දරුවා හසුවෙමින් සිටියදී පවා, වීඩියෝව පටිගත කිරීමේ සිහියෙන් සිටි මව්පියන්ට ඒ පිළිබඳව නිසි අවධානයක් යොමුවී නැහැ.

වාසනාවකට මෙන්, ඒ අසල සිටි වෙනත් පුද්ගලයෙකු වහාම ක්‍රියාත්මක වී මුහුදු රළට හසුවෙමින් සිටි දරුවාව අල්ලාගෙන උපකාර කිරීමට ඉදිරිපත් වී තිබෙනවා. එසේ නොවන්නට සිදුවන්නට ගිය විනාශය සිතාගැනීමට පවා අපහසුයි.

මෙම සිදුවීම අන්තර්ජාලයට මුදාහැරීමත් සමඟ ලොව පුරා සමාජ මාධ්‍ය පරිශීලකයින්ගෙන් අදාළ මව්පිය යුවළට එල්ල වන්නේ දැඩි විවේචනයක්. කිරිකැටි දරුවන්ගේ ජීවිත ආරක්ෂාවට වඩා තත්පර කිහිපයක සමාජ මාධ්‍ය වීඩියෝවකට ප්‍රමුඛත්වය දීම කොතරම් ඛේදවාචකයක්ද යන්න බොහෝ දෙනා ප්‍රශ්න කර සිටිනවා.

ජංගම දුරකථනයට සහ සමාජ මාධ්‍යවලට ඇබ්බැහි වී සිටින වර්තමාන දෙමාපියන්ට මෙය කදිම පාඩමක් මෙන්ම රතු එළියක් බවයි බොහෝ දෙනා අදහස් දක්වමින් පවසන්නේ