පාසල් කාලසටහන වෙනස් වෙයි – නව අධ්‍යාපන ප්‍රතිසංස්කරණය යටතේ ඉගෙනුම් වේලාව මෙන්න

නව අධ්‍යාපන ප්‍රතිසංස්කරණ ක්‍රියාත්මක කිරීමේ අරමුණින්, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය විසින් ලබන වසරේ සිට ක්‍රියාත්මක වන පරිදි, ශ්‍රේණි මට්ටම් අනුව පාසල් ඉගෙනුම් වේලාවන් වෙනස් කිරීමට පියවර ගෙන ඇත.

ඒ අනුව, පාසල් කාලසටහන් සකස් කිරීම සම්බන්ධයෙන් නව චක්‍රලේඛයක් නිකුත් කර ඇති අතර, පළාත් ප්‍රධාන ලේකම්වරුන්, අධ්‍යාපන ලේකම්වරුන්, අධ්‍යාපන අධ්‍යක්ෂවරුන් සහ විදුහල්පතිවරුන් වෙත ඒ සඳහා අවශ්‍ය උපදෙස් ලබා දී තිබේ.

මෙම නව කාලසටහනට අනුව, එක් එක් ශ්‍රේණි මට්ටම් සඳහා වන වේලාවන් පහත පරිදි වේ:

1 සහ 2 ශ්‍රේණි: උදෑසන 7:30 සිට පෙරවරු 11:45 දක්වා.

3 සහ 4 ශ්‍රේණි: උදෑසන 7:30 සිට පස්වරු 1:00 දක්වා.

5 ශ්‍රේණියේ සිට උසස් පෙළ දක්වා: උදෑසන 7:30 සිට පස්වරු 1:30 දක්වා.

මෙම වසර මුලදී 1 ශ්‍රේණියේ සිසුන් සඳහා නව විෂය නිර්දේශයක් හඳුන්වා දුන් අතර, ලබන වසරේදී 2 ශ්‍රේණිය සහ 6 ශ්‍රේණියේ සිසුන් සඳහා නව විෂය නිර්දේශ හඳුන්වා දීමට නියමිතය.

සිසුන් ඉහළ ශ්‍රේණිවලට එළැඹීමත් සමඟ, මෙම නව විෂය නිර්දේශ රාමුව ක්‍රමයෙන් පුළුල් කරනු ලැබේ. තවද, වර්තමාන 1 ශ්‍රේණියේ සිසුන් 5 ශ්‍රේණියට පැමිණෙන විට, මෙම නව අධ්‍යාපන ප්‍රතිසංස්කරණ ඔවුන්ට ද අදාළ වනු ඇත.

මීට අමතරව, මෙම නව විෂය නිර්දේශ ප්‍රතිසංස්කරණ 2030 වසරේ සාමාන්‍ය පෙළ විභාගයට සහ 2033 වසරේ උසස් පෙළ විභාගයට ඇතුළත් කිරීමට සැලසුම් කර ඇති බව ද නිවේදනය කර තිබේ.